Jaffna – Puthinam NEWS புதினம் – Sri Lanka Tamil NEWS

மாவையின் உடல் தீயுடன் சங்கமம்

புதினம் — Sun, 02 Feb 2025 10:21:14 +0000

தமிழரசுக் கட்சியின் சிரேஷ்ட தலைவரும், முன்னாள் யாழ் மாவட்ட நாடாளுமன்ற உறுப்பினருமான மாவை சேனாதிராஜாவின் இறுதிக் கிரிகைகள் இன்று (02/02) இடம்பெற்று, பூதவுடல் மாவிட்டபுரம் இந்து மயானத்தில் தகனம் செய்யப்பட்டது.

தமிழரசுக் கட்சியின் அண்மைக் கால நடவடிக்கைகளால் மிகவும் மன உளைச்சலில் இருந்த மாவை, அரசியலில் இருந்து ஒதுங்கியே இருந்தார். கடந்த புதன்கிழமை (29/01/2025) இயற்கை எய்திய மாவை சேனாதிராஜாவின் பூதவுடலிற்கு ஜனாதிபதி அநுர குமார திசாநாயக்கா உட்பட பல அரசியல்வாதிகள் நேரில் வந்து அஞ்சலி செலுத்தியிருந்தனர்.

The post மாவையின் உடல் தீயுடன் சங்கமம் appeared first on Puthinam NEWS புதினம் - Sri Lanka Tamil NEWS.

எலிக்காய்ச்சலினால் 7பேர் உயிரிழப்பு

புதினம் — Sat, 14 Dec 2024 03:47:22 +0000

யாழ் மாவட்டத்தில் பரவிவரும் எலிக்காய்ச்சலால் இதுவரை 6பேர் உயிரிழந்துள்ளதுடன், முல்லைத்தீவு மாவட்டத்தில் ஒருவர் உயிரிழந்துள்ளார். 58பேர் எலிக்காய்ச்சல் தொற்றினால் பாதிக்கப்பட்டுள்ளனர் என மாவட்ட பிராந்திய சுகாதார சேவைகள் பணிப்பாளர் வைத்தியர் கேதீஸ்வரன் தெரிவித்துள்ளார்.

மேலும் எலிக்காய்ச்சல் தொடர்பான பாதிப்புகள் கட்டுப்பாட்டில் உள்ளதாகவும், தாம் எலிக்காய்ச்சல் தொற்றின் பாதிப்பு மற்றும் தடுப்பு நடவடிக்கைகள் தொடர்பாக தொடந்தும் அவதானித்து வருவதாகவும் யாழ் போதனா வைத்தியசாலை நிர்வாக இயக்குனர் வைத்தியர் சத்தியமூர்த்தி அவர்கள் தெரிவித்துள்ளார்.

இதேவேளை எலிக்காய்ச்சல் தொடர்பான தடுப்பு நடவடிக்கைகள் மற்றும் விழிப்புணர்வு செயற்பாடுகள் மக்கள் மத்தியில் பரவலாக மேற்கொள்ளப்பட்டு வருகின்றமையும் குறிப்பிடத்தக்கது.

The post எலிக்காய்ச்சலினால் 7பேர் உயிரிழப்பு appeared first on Puthinam NEWS புதினம் - Sri Lanka Tamil NEWS.

யாழ்ப்பாணத்தில் மர்ம காய்ச்சலினால் இதுவரை ஐவர் உயிரிழப்பு

புதினம் — Wed, 11 Dec 2024 15:16:44 +0000

யாழ்ப்பாணத்தில் பரவிவரும் இனம்தெரியாத ஒருவகை காய்ச்சலினால் இதுவரை ஐவர் உயிரிழந்துள்ளதாக யாழ் போதனா வைத்தியசாலையின் நிர்வாக இயக்குனர் வைத்தியர் சத்தியமூர்த்தி தெரிவித்துள்ளார்.

20 வயதிற்கும் 65 வயதிற்கும் உட்பட்டவர்களே உயிரிழந்துள்ளதாக தெரிவித்துள்ள திரு சத்தியமூர்த்தி, இந்த மர்ம காய்ச்சலின் அறிகுறிகள் எலிக்காய்ச்சலுக்கு ஒப்பான அறிகுறிகளாகக் காணப்படுவதாகவும் தெரிவித்துள்ளார். இருப்பினும் இதனை உறுதி செய்ய, இரத்த மாதிரிகள் கொழும்பிற்கு அனுப்பி வைக்கப்பட்டுள்ளதாகவும் அவர் தெரிவித்துள்ளார்.

The post யாழ்ப்பாணத்தில் மர்ம காய்ச்சலினால் இதுவரை ஐவர் உயிரிழப்பு appeared first on Puthinam NEWS புதினம் - Sri Lanka Tamil NEWS.

வெள்ளப்பெருக்கு காரணமாக வடமாகாணத்தில் 15,622பேர் பாதிப்பு

புதினம் — Sun, 24 Nov 2024 12:53:07 +0000

தொடரும் கடும் மழை காரணமாக வடமாகாணத்தில் இதுவரை 15,622பேர் பாதிப்பிற்குள்ளாகியுள்ளனர் என அனர்த்த முகாமைத்துவ நிலையம் தெரிவித்துள்ளது.

யாழ் மாவட்டத்தில் இதுவரையில் 29 வீடுகள் சேதமடைந்திருப்பதுடன், 7,025பேர் வரையில் பாதிக்கப்பட்டுள்ளனர். மன்னார் மாவட்டத்தில் 7,854 பேரும், கிளிநொச்சி மாவட்டத்தில் 365 பேரும் பாதிக்கப்பட்டுள்ளனர்.

வங்காள விரிகுடாவில் உருவாகியுள்ள வலுவான தாழமுக்கத்தால் கடும் மழைவீழ்ச்சி ஏற்படும் என இலங்கை வளிமண்டலத் திணைக்களம் தெரிவித்துள்ளது. இதனால் இலங்கையை சூழவுள்ள கடற்பகுதிகளுக்கு சிவப்பு எச்சரிக்கை விடுக்கப்பட்டுள்ளது.

நவம்பர் 25ம் திகதி தொடக்கம் 28 வரையான காலப்பகுதியில் வடக்கு மாகாணத்தில் கடும் மழை பொழியுமென தெரிவிக்கப்பட்டுள்ளது.

The post வெள்ளப்பெருக்கு காரணமாக வடமாகாணத்தில் 15,622பேர் பாதிப்பு appeared first on Puthinam NEWS புதினம் - Sri Lanka Tamil NEWS.

தமிழரசுக் கட்சிக்கு 8 ஆசனங்கள்

புதினம் — Sat, 16 Nov 2024 09:52:55 +0000

வடக்கு கிழக்கின் பாரம்பரிய தமிழ் கட்சியான தமிழரசுக் கட்சிக்கு இம்முறை எட்டு ஆசனங்கள் கிடைக்கப் பெற்றுள்ளன. தனித்துப் போட்டியிட்ட தமிழரசுக் கட்சி எட்டு ஆசனங்களைப் பெற்றமை, அக்கட்சிக்கு ஒரு வகையில் வெற்றியே.

கட்சியின் முன்னாள் தலைவர் இரா.சம்பந்தனின் மறைவிற்குப் பின்னர் சந்திக்கும் முதலாவது பொதுத் தேர்தல் இதுவாகும்.

கடந்த காலங்களில் டெலோ, புளொட் மற்றும் சிறிய கட்சிகளுடன் கூட்டு சேர்ந்து தேர்தலில் போட்டியிட்ட தமிழரசுக் கட்சி, இம்முறை சுமந்திரனின் தலையீட்டினால் தனித்து களம் இறங்கியது. சுமந்திரன் மீதான உட்கட்சி மற்றும் இதர கூட்டணிக் கட்சிகளின் அதிருப்தி, தேசிய மக்கள் சக்தியின் பாரிய எழுச்சி மற்றும் வைத்தியர் அர்ச்சுனாவின் சுயேட்சைக் குழுவின் அதிரடியான பிரச்சாரங்கள் என பல பக்கத்தாலும் பல சவால்களை யாழ் தேர்தல் களத்தில் எதிர்கொண்டது தமிழரசுக் கட்சி.

இம்முறை தேர்தலில், யாழ் தேர்தல் மாவட்டத்தில் தமிழரசுக் கட்சி முதன் முறையாக இரண்டாம் இடத்திற்கு தள்ளப்பட்டுள்ளதுடன், வன்னி தேர்தல் மாவட்டத்தில் மூன்றாம் நிலைக்கு தள்ளப்பட்டிருந்தமையும் குறிப்பிடத்தக்கது. யாழ் தேர்தல் மாவட்டத்தில் தேசியக் கட்சி ஒன்று மூன்று ஆசனங்களைப் பெற்றமையும் இதுவே முதல்முறையாகும்.

கடந்த ஜனாதிபதி தேர்தலில் தமிழரசுக் கட்சி ஆதரவளித்த சஜித் பிரேமதாசாவின் ஐக்கிய மக்கள் சக்தி யாழ்ப்பாணம் மற்றும் வன்னி மாவட்டங்களில் போட்டியிடாமல் விட்டிருந்தால் தமிழரசுக் கட்சிக்கு மேலும் ஒன்று அல்லது இரண்டு ஆசனங்கள் கிடைத்திருக்கலாம்!! ஐக்கிய மக்கள் சக்தி யாழ் மாவட்டத்தில் 15,276 வாக்குகளைப் பெற்றிருந்தமையும் இங்கே சுட்டிக்காட்டப்படவேண்டும்.

தேர்தல் மாவட்டம்	வாக்குகள்	ஆசனம்
யாழ்ப்பாணம்	63,327	1
வன்னி	29,711	1
திருகோணமலை	34,168	1
மட்டக்களப்பு	96,975	3
அம்பாறை	33,632	1
தேசிய பட்டியல்		1
	257,813	08

The post தமிழரசுக் கட்சிக்கு 8 ஆசனங்கள் appeared first on Puthinam NEWS புதினம் - Sri Lanka Tamil NEWS.

யாழ்ப்பானம் தேர்தல் மாவட்ட விருப்பு வாக்குகள் விபரம்

புதினம் — Sat, 16 Nov 2024 00:40:12 +0000

2024 பாராளுமன்ற பொதுத் தேர்தலில் தேசிய மக்கள் சக்தி நாடு முழுவதும் மாபெரும் வெற்றியைப் பெற்றுள்ளது.

யாழ் தேர்தல் மாவட்டத்திலும் 80,830 வாக்குகளைப் பெற்று மூன்று ஆசனங்களை வென்றுள்ளது தேசிய மக்கள் சக்தி. பாரம்பரிய தமிழ் கட்சியான தமிழரசுக் கட்சி ஒரு ஆசனத்தையும், தமிழ்த் தேசிய மக்கள் முன்னணி ஒரு ஆசனத்தையும், வைத்தியர் அர்ச்சுனாவின் சுயேட்சைக் குழு ஒரு ஆசனத்தையும் வென்றுள்ளன.

முன்னாள் பாராளுமன்ற உறுப்பினர்களான சுமந்திரன், டக்ளஸ் தேவானந்தா, அங்கஜன் இராமநாதன், செல்வராசா கஜேந்திரன் ஆகியோர் இம்முறை தோல்வியடைந்துள்ளனர்.

இதேவேளை வைத்தியர் அர்ச்சுனாவுடன் இணைந்து போட்டியிட்ட சட்டத்தரணி கெளசல்யா 15,789 வாக்குகளைப் பெற்றிருந்தார். சுமந்திரன் (15,039 வாக்குகள்) மற்றும் கஜேந்திரகுமார் பொன்னம்பலம் (15,135 வாக்குகள்) ஆகியோர் பெற்ற வாக்குகளைக் காட்டிலும் கெளசல்யா பெற்ற வாக்குகள் அதிகம் என்பது குறிப்பிடத்தக்கது.

யாழ் தேர்தல் மாவட்டத்தில் தமிழரசுக் கட்சியின் சிவஞானம் சிறீதரன் அதிகூடிய விருப்பு வாக்குகளைப் பெற்றுள்ளார். வெற்றி பெற்ற வேட்பாளர்களின் முழுமையான விருப்பு வாக்குகள் விபரம் இதோ.

The post யாழ்ப்பானம் தேர்தல் மாவட்ட விருப்பு வாக்குகள் விபரம் appeared first on Puthinam NEWS புதினம் - Sri Lanka Tamil NEWS.

வடக்கிலும் மாபெரும் வெற்றி பெற்றது தேசிய மக்கள் சக்தி

புதினம் — Fri, 15 Nov 2024 23:53:41 +0000

நடந்து முடிந்த பொதுத் தேர்தலில் வடக்கு மாகாணத்திலும் மாபெரும் வெற்றி பெற்றுள்ளது தேசிய மக்கள் சக்தி. யாழ்ப்பாணம் மற்றும் வன்னி தேர்தல் மாவட்டங்களில் தேசிய மக்கள் சக்தி மொத்தமாக 5 ஆசனங்களைப் பெற்று, வடக்கு அரசியல் கட்சிகளுக்கு பாரிய அதிர்ச்சியைக் கொடுத்துள்ளது.

குறிப்பாக யாழ்ப்பாணம் தேர்தல் மாவட்டத்தில் காலம் காலமாக கோலூச்சி வந்த தமிழரசுக் கட்சியை வீழ்த்தி மூன்று ஆசனங்களை வென்ற தேசிய மக்கள் சக்தி, வன்னி தேர்தல் மாவட்டத்திலும் இரண்டு ஆசனங்களை வென்றுள்ளது.

யாழ்ப்பாணம் தேர்தல் மாவட்டம்

யாழ்ப்பாணம் மற்றும் கிளிநொச்சி மாவட்டங்களை உள்ளடக்கிய யாழ்ப்பாணம் தேர்தல் மாவட்டத்தில் மொத்தமாக 80,830 வாக்குகளைப் பெற்று மூன்று ஆசனங்களைப் பெற்றுள்ளது தேசிய மக்கள் சக்தி. முதன்மை வேட்பாளர் க.இளங்குமரன் 32,102 வாக்குகளைப் பெற்றிருந்தார்.

க.இளங்குமரன் – 32,102
Dr.ஶ்ரீ பவானந்தராஜா – 20,430
ஜெ.ரஜீவன் – 17,579

வன்னி தேர்தல் மாவட்டம்

முல்லைத்தீவு, வவுனியா மற்றும் மன்னார் மாவட்டங்களை உள்ளடக்கிய வன்னி தேர்தல் மாவட்டத்தில் 39,894 வாக்குகளைப் பெற்று இரண்டு ஆசனங்களைப் பெற்றுள்ளது தேசிய மக்கள் சக்தி.

Dr.செ.திலகநாதன் – 10,652
ஆ.ஜெகதீஸ்வரன் – 9,280

The post வடக்கிலும் மாபெரும் வெற்றி பெற்றது தேசிய மக்கள் சக்தி appeared first on Puthinam NEWS புதினம் - Sri Lanka Tamil NEWS.

யாழ்ப்பாண தேர்தல் தொகுதியை கைப்பற்றிய தேசிய மக்கள் சக்தி

புதினம் — Thu, 14 Nov 2024 21:12:34 +0000

நடைபெற்ற பாராளுமன்ற தேர்தலில் யாழ்ப்பாண மாவட்டத்தின் யாழ்ப்பாண தேர்தல் தொகுதியில் தேசிய மக்கள் சக்தி பெருவெற்றி பெற்றுள்ளது.

செல்லுபடியான 23,631 வாக்குகளில், 9,066 (41.46%) வாக்குகளைப் பெற்று தேசிய மக்கள் சக்தி வெற்றி பெற்றுள்ளது. தமிழரசுக் கட்சி 2,582 வாக்குகளை பெற்று இரண்டாம் இடத்தில் உள்ளது.

The post யாழ்ப்பாண தேர்தல் தொகுதியை கைப்பற்றிய தேசிய மக்கள் சக்தி appeared first on Puthinam NEWS புதினம் - Sri Lanka Tamil NEWS.

சுன்னாகம் பொலிசாரின் காட்டுமிராண்டித்தனம், சிசு உட்பட மூவர் மீது தாக்குதல்

புதினம் — Mon, 11 Nov 2024 01:43:48 +0000

யாழ்ப்பாணம் சுன்னாகம் பிரதேச பொலிசார் இரண்டு மாத சிசு உட்பட மூவரை காட்டுமிராண்டித்தனமாக தாக்கியுள்ளனர்.

ஒரு குடும்பம் பயனித்த வாகனம் ஒன்றை மோட்டார் சைக்கிளில் முந்திச் செல்ல முற்பட்ட இருவர் வாகனத்திற்கு முன்னால் தடுமாறி விழுந்து விபத்துக்குள்ளாகியுள்ளனர். அவர்கள் இருவரும் நிறை போதையில் இருந்துள்ளனர்.

சம்பவ இடத்திற்கு சிவில் உடையில் வந்த பொலிசார் வாகன சாரதியிடம் அனுமதிப்பத்திரம் மற்றும் வாகன பத்திரங்களை கேட்டுள்ளனர். இருப்பினும் அந்த சாரதி போக்குவரத்து பொலிசாரை வரவழைத்தால் காட்டுகிறேன் என கூறியுள்ளார். இதனால் ஆத்திரமடைந்த பொலிசார் அந்த சாரதியை கடுமையாகத் தாக்கியுள்ளனர். அதனை தடுக்கச் சென்ற கைக்குழந்தையுடன் இருந்த மனைவியையும் தாக்கியுள்ளதுடன், குழந்தையை தூக்கி பற்றைக்குள் வீசியும் உள்ளனர்.

பின்னர் சம்பவ இடத்திற்கு சீருடையில் வந்த பொலிசார், சாரதியை கைது செய்ததுடன், வாகனத்தை பொலிஸ் நிலையத்திற்கு எடுத்துச் சென்றுள்ளனர். பொலிஸ் நிலையத்தில் வைத்தும் சாரதி மீது தாக்குதல் நடத்தப்பட்டுள்ளது.

வீடியோ இணைப்பு –> https://www.facebook.com/share/r/8mHxRWawaZJ9A1Pn/?mibextid=WC7FNe

மேற்படி சம்பவம் தொடர்பாக தனிக்குழு அமைத்து விசாரணை நடைபெறுவதாகவும், சம்பந்தப்பட்ட பொலிசார் மீது சட்ட நடவடிக்கைகள் எடுக்கப்படும் என யாழ் பிராந்திய பொலிஸ் பொறுப்பதிகாரி தெரிவித்துள்ளார்.

பாதிக்கப்பட்ட குடும்பம் சார்பாக தமிழ்த் தேசிய மக்கள் முன்னணியின் சட்டத்தரணி ந.காண்டீபன் நீதிமன்றில் ஆஜர் ஆகியுள்ளார்.

The post சுன்னாகம் பொலிசாரின் காட்டுமிராண்டித்தனம், சிசு உட்பட மூவர் மீது தாக்குதல் appeared first on Puthinam NEWS புதினம் - Sri Lanka Tamil NEWS.

இராணுவ ஆக்கிரமிப்பு காணிகள் கட்டம் கட்டமாக விடுவிக்கப்படும் – ஜனாதிபதி

புதினம் — Mon, 11 Nov 2024 00:55:48 +0000

யாழ்ப்பாணத்தில் இராணுவத்தினரால் பல்வேறு தேவைகளுக்காக பெற்றுக்கொள்ளப்பட்ட காணிகள் கட்டம் கட்டமாக விடுவிக்கப்படும் என ஜனாதிபதி அநுர குமார திசாநாயக்கா யாழ்ப்பாணத்தில் தெரிவித்துள்ளார்.

வடபகுதி மக்கள் உண்மையான சுதந்திரத்தை அனுபவிப்பதை உறுதி செய்யப்படுவதற்கான நடவடிக்கைகள் எடுக்கப்படும் எனவும் ஜனாதிபதி தெரிவித்துள்ளார்.

தேசிய மக்கள் சக்தியின் யாழ் மாவட்ட வேட்பாளர்களை ஆதரித்து யாழ்ப்பாணம் பாசையூர் பகுதியில் இடம்பெற்ற கூட்டத்தில், ஜனாதிபதியுடன் யாழ் மாவட்ட தேசிய மக்கள் சக்தியின் முதன்மை வேட்பாளர் இளங்குமரன் உட்பட பல வேட்பாளர்கள் கலந்துகொண்டிருந்தனர்.

தமிழ் மக்களை தமிழ் அரசியல்வாதிகள் தவறான பாதையில் வழிநடத்துகிறார்கள் – ஜனாதிபதி

The post இராணுவ ஆக்கிரமிப்பு காணிகள் கட்டம் கட்டமாக விடுவிக்கப்படும் – ஜனாதிபதி appeared first on Puthinam NEWS புதினம் - Sri Lanka Tamil NEWS.